العدد الثالث من مجلة النديم
1:17 م Edit This 0 Comments »المحتويات
1- آن لنا أن نفرح وإلى الأبد د. يسرى العزب
2- عاشق الكلمة شعر . مصطفى فريد
3- للميدان كلمة شعر . على شيحه
4- تجليات العامية المصرية فى ديوان
نفس دافئ . دراسة . أبو العنين شرف الدين
الفــائــــزون
1- بشرى الوردانى قصيدة عشق
2- محمد سلام عشر سجاير
3- عاصم المراكبى لا
4- جمال الجمال عطفة مأمون
5- مصطفى عبد الرحمن قصة صبى
6- شيماء عزت المجذوب .. والدرويش
7- رضا عفيفى بيت العرب
8- مصطفى عبد الحميد طبيبة خلع
9- سارة أشرف يارب قربنى
10- عبد المنعم شرف الدين حلم عيل
* أشعار مختارة
* مصر الحبيبة شعر. مريم توفيق
* تاج النسب شعر . محمد عباس
* كلاسيك شعر . أمل عامر
* رسالة إلى طاغية شعر . عاطف الجندى
* لماذا يا أبى قصة آمال يوسف
* أخبار ثقافية
* الصمت منون شعر . أبو العنين شرف الدين
ترحب مجلة النديم باقتراحاتكم وآرائكم ونستقبل جميع الشعراء والأدبـــاء مـــن خلال العنوان 6 ش الملك فيصل بمدينة ميت غمر
0199285341 - 6950738/050 تصدر هذه المجلة تحت رعاية جريدة العروبة
آن لنا أن نفرح وإلى الأبد
بقلم د. يسرى العزب
على غير توقع تفاجئنا الأيام بأروع ما عاشت مصر تتمناه وتحلم به أكثر من أربعة عقود .. الثورة الشعبية الماجدة التى أوقد شمعتها شباب مصر الكبار عقلاً وجسارة وانتماء وما لبثت هذه الشمعة أن امتدت بنارها ونورها لتحرق الفساد والطغيان والتجاهل والإرهاب والإقصاء والتى أشاعها النظام الحاكم فى واقعنا على مدى العقود الأربعة التى انتهت .. إلى غير رجعة .. فى صبح الخامس والعشرين من يناير الماضى 2011 لتبدأ أعلى أنقاضها فى صناعة زمن جديد .. يصنعه شعب مصر كله الذى أعادت له الثورة شموخه وعظمته ونخوته وغيرته .. الذى نهض ثائراً ليعيد مصر وجهها النضر البهي وليشع على الخريطة العربية كلها لتستعيد أمتنا العربية قدرتها التى سلبها الطغاة الحاكمون فتقف من جديد فى وجه أعدائها الذى أعاقوا نهضتها فلم تتمكن من إنجاز مشروعها الأمل – الوحدة العربية التى بها يصنع الشعب العربى مجده الحاضر ومجده الآتي لتبقي أمتنا " خير أمة أخرجت للناس " تنشر بالديمقراطية مكارم الأخلاق من جديد وبالعزم تؤسس لحضارة معاصرة أقوى من حضارتها فى الماضى حين كانت دولة واحدة .
حضارة تتأسس على المساواة فى الحقوق والواجبات يحكم فيها الشعب بالعدل فيحقق التنمية البشرية الشعبية التى تصعد بالوطن إلى أعلى حتى يصل بالعلم وبالإبداع إلى مصاف الدول التى سبقتنا والتى سعى بعضها إلى إعاقتنا ..
أما وقد قامت ثورتنا التى عشنا على أمل قيامها .. فإنها أيقظتهم – أيضاً – على حقيقتنا الأقوى القادرة .. التى اكتشفوا أنهم وعملاً أوهم من حاكمينا وطغاتنا لم يفلحوا فى قهرها .. لقد اضطروا رغماً عنهم وبفعل الثورة المصرية العربية للاعتراف بهذه الحقيقة .. لقد آن لنا أن نفرح وأن نمضى فى طريقنا الثورى صاعدين إلى أعلى عليين .
عاشق الكلمة
شعر . مصطفى فريد
صحفى وشاعر وقاص
قلبه من سنين حساس
إنسان بسيط جداً
ولكن فى الأدب نبراس
أستاذ فى نظم الكلام
معشوق قلبو الناس
خدوم وقلبه وفى
مليان تقى وإخلاص
وبين صوابعه قلم
يعصر حروف تنباس
ولاجل خاطره أنا
جاى له بكل حماس
من طنطا زاحف وماشي
وقلمى زى الفاس
خضر غيطان الشراقى
طرحت غنا للناس
يمين برب عظيم
إنك إنت يا أبو العنين
صاحب القلب الكبير
عاشق الكلمة بضمير
وحلم عمرك من سنين
تنام يغطيك الكلام
مش أى كلمة والسلام
عارفك بتعشق الاحترام
وكلمه ما تخاف من لئيم
كلمة تبرق .. كلمة تصرخ
كلمة تلسع ضهر ظالم .
تبقى زغرودة ليتيم
تبقى نبله
تبقى حربه فى قلب فاسد
تبقى زى السيف محاربه
مره غاضبه مره راضيه
مره قاضيه
مره حصوه فى عين حسود
مره ضحكة فى عين صبية
أو ولد باكى الخدود
تبدر الإخلاص تعود
تعزف حروف عشقك ورود
سكك ودروب وطاقة نور
تقربنا من المحبوب
ترسم وعدنا المكتوب
تناجى الصدق والإخلاص
مع الفطنة .......
تقتل حية الفتنة
فى قلوب الناس
تناجى يا أبو العنين بكره
وتنتج كلمتك فكره
تصبح للتاريخ نبراس
للميدان كلمة
شعر . على شيحه
مبروك يا مصر لشبابك
مش لأحزابك
دول نن عينك يا بلدى
وهم أهدابك
عاشقين نسيمك ترابك
عنبك وعنابك
النخل لما نهزه
يميل على بابك
ويقول شبابك عملها
والبركة فى شبابك
فجر الضمير من هنا
انتو اللى غيرتوه
حتى الجمال اللى فينا
انتو اللى قبحتوه
الصبر جوه البشر
بالظلم فجرتوه
إعلامكم فاسد
وهز الوسط سيبتوه
النيل شكا لربنا
وانتو اللى زعلتوه
أنا الميدان الرحم
والبلطجيه هانوه
أنا الميدان الوسيع
الوطن ولاد
أحمد ويوسف وجرجس
مريم فى حضن سعاد
عرفوا الحقيقة وهم فى الرحم عايشين
دول ولدنا يا وطن من ضهرنا طالعين
يقولوا لا للفساد
والصرخة حرية
تلاتين سنة
والغلابة فى البلد تايهين
والحكم فاسد والمجلسين باطلين
والعز كان للعزيز
وشلة التعابين
أنا الميدان الوطن
وكل شيء بميعاد
أنا الميدان الوسيع
إذا السيناريو إنعاد
وفجأة ماهيش مفاجأة
ركيبة الموجة فاكرينها هوجة فشر
يا شلة الفاشلين
متفرقين فى الميدان
والحقد جوه الدم
الغم أصلا نشيدهم
والفعل منهم شين
فاهمين هنبلع كلامهم
وان الشباب ساذجين
الشعب عارف خدعهم
رايح ياسوس على فين
ممنوع ميدان الشرف
يندق فيه أسافين
أنا الميدان الحضارة يا شلة التافهين
ويا راكب الموجة ارحل
مهما تكون سباح
البحر هاج قوى
أنا شايفه من مرتاح
أبلع ريالتك وروح
صوتك ده ولا نباح
روح هز ديلك بعيد
بلا هنكرة وصياح
أنا الميدان اللى شايفك
أنا مشرط الجراح
يا حزب هيصة وبيصة
يا كل أحزابها
وطنى وغيره وغيره
للبلطجة كلابها
الفتنة حلت ما بينا
وانتو أسبابها
سيبو شبابها يعبر
يقرا فى كتابها
الثورة نبض الألم
يحيها أسبابها
أنا الميدان الوطن
وفى حضن أحبابها
مين اللى جابكم هنا
ياللى إحنا عرفنكم
إحنا فى ميدان الشرف
روحو لميدانكم
لجل الدولار النجس
بتغيروا دينكم
ولا العمى والضلال
نشن وجا صابكم
الكل شايف خداعكم
واحنا اللى فاهمينكم
وياما قلنا بوضوح
بتاجرو فى وطنكم
أن الميدان اللى شايف
وهد أحلامكم
وانت يا صاحب الجريدة
اكتب على كيفك
وغطى زيفك
واركب الموجة
فنان وساعة الخطر
الكلمة معوجة
ع الشاشة نسمع كلامك
وللميدان كلمة
أقفل جريدتك وروح
وإلزم هناك بيتك
أنا الميدان الوطن
رافض هنا صوتك
خايف عليك يا وطن
وباحذرك منه
لو عايز أكتب كتير
أكتب كتير عنه
يا ريت يبطل كلام ويحترم سنه
حتى العرب كلهم
متبريين منه
هوه العراق يتنسى
فين عقله يا دمه
راح الميدان وانطرد
حتى الشباب ذمه
أن الميدان اللى قال
تحرم عليه أمه
ولما سقط النظام
هربوا الفيران م العرب
هيروحوا فين مننا
دول اللى خانوا الشعب
سرقوا ونهبوا وقتلوا
والأمن عاونهم
إحنا الضحايا لهم
فين راحوا أعوانهم
يا تسلموهم لنا
يا يشيلوا أكفانهم
الشعب رافض وجودهم
شفتوه يبلعنهم
أنا الميدان محكمة
أعدل وما ارحمهم
ساعتها يحلى الكلام
وافرح وأغنى لها
وأقول لنيلها
ولادك هم اللى عاملينها
هم الأمل للى جاى
حافظين جمايلها
ما فيش مثيلها ف حنانها
وف جوها ونيلها
إلى الكوخ
" كيف أميت النور بعينى
هذى الشمس المحبوسة فى ثنيات الأيام تثاقل
كل صباح ، ثم تنفض عن عينيها النوم ومع النوم الشفقة
وتواصل راحلتها الوحشية فوق الطرقات " .
الحلاج ..مسرحية صلاح عبد الصبور
التقرير
" الليل عميق والدار صامتة
وأعشاش العصافير مسربلة بالنعاس .. اذكرى لى
من خلال عبراتك المترددة ، من خلال بسماتك
المضطربة . من خلال خجلك العذب وآساك .
اذكرى لى سر قلبك " .
طاغور
تجليات العامية المصرية فى ديوان "نفس دافئ"
بقلم . أبو العنين شرف الدين
التنوع بين القصيدة والومضة ثم الرباعيات .. فيه تركيبات فنية بأسلوب يساير العصر ويبث من خلاله الشاعر أوجاع الوطن .
شد انتباهى الشاعر فى قصيدة " عايش إزاى "
مكتبتش حلمك ع الهادى ؟
وقعدت تصبه فى فنجانك
بتونس بالشعلة الباقية
فى سبرتاية ..
ما عا دتش تكفى
عشان تنتفس ريحة نار
ماحولتش تتكلفت فى عبايتك ؟
وتفكر فى حبيبتك ع البحر
ف عز البرد
وف إيدك كباية شاى بالنعناع
بتبص لسما مليانة نجوم
أفكارك غرقانة فى وردات
والريحة اللى بتطلع منك
بتخلى الكون من حواليك
عقد كلام فى جنية نور
خيال الشاعر فى قصيدة الحالة التى تمثل جزء من الواقع وينتقل بالصور الشعرية المجملة والمكملة : الشاعر يتساءل عن الحلم وبتساءل وهو يجلد الذات فيقول :
ما عملتش حاجة تريح قلبك ؟ خالص / أمال ازاى السما طايقاك / تمشى على الأرض ؟
يسرح بالخيال لصورة وف إيدك كباية شاى بالنعناع ؟ بتبص لسما مليانة نجوم ؟
ثم يستخلص الشاعر فى جملة شعرية : عقد كلام فى جنية نور
الملاحظ الرباعيات التى يطرز بها الديوان قبل القصيدة فى حكمة مركزه لها إيقاع جميل محبب لدى السامع لأن فيها الدهشة والصدمة يجعل السامع ينتبه ويحلق فى نشوة العبرة أول رباعية هى :
ماشيه السنين بتجر رجليها بزهق
واحنا وراها بنجرى ونسقط ورق
ولا حد يعرف كام نتيجه حتنطوى
ولا عمرنا اتخلصنا من سيف القلق
فن مربع ابن عروس بالعامية المصرية والمحاولات مستمرة عند بيرم التونسي وصلاح جاهين وفى رباعيات الخيام التى ترجمها أحمد رامى وشدت بها أم كلثوم وشغلت المفكرين والفلاسفة لما تتبناه من حكمة وعبرة وموعظة ودهشة وتأمل .
والشاعر وحيد وصفى دخل التجربة فى أول رباعية حول ورق النتيجة فى شطرات أربع والثالث معروج تأمل معى الرباعية الثانية :
عابر سبيل بس السبيل رافض عبورى
طول الطريق من أوله واقف بزورى
ولا حـــد مـــد إيديــــه بلمسة طبطبه
ولا بق ميه يكون فى ليلة صوم سحورى
الشاعر هنا محتاج لمسة حنان أو بق ميه يروى عطشه فى ليلة سحوره والصورة فيها الدهشة والعبرة وتراكيب البناء الفنى
أما فى رباعية رقم 3 يقول :
دخلت جحر الديابه برغبتك يا خروف
وطرحت فكرة تفاوض هادى ع المكشوف
ما فضلش منك ولا فتفوته تتفاوض
غير دم على فروتك سايل كلام وحروف
هنا يتجلى إبداعات العامية المصرية فى تراكيب اللفظ المعبر عن المعنى والدلالة هنا الشاعر يسوق حكمة من يدخل جحر الديابة برعبك يا خروف حتماً سوف يقضى عليه ويصور الساعر فى تسلسل بديع النهاية المحتومة .
رباعية رقم 4 صور أخرى عن أحوال الدنيا يقول فيها :
الدنيا لما تعشمك بالحلم ما توافى
لكن إذا تندهك حتروح لها حافى
حاسب لا تسكر من الدمع اللى ماليها
وعشان تفوق منها موتك ماهوش كافى
الشاعر هنا يتحدث عن الغرور بالدنيا الحكمة البليغة والحقيقة التى لا مفر منها ، الشاعر يبث أوجاعه ولوعته بل حيرته من خلال حروف مرصعه بالضوء الكاشف والمعبر عن الموقف فى الرباعية . الرباعية الخامسة :
وأنا بادخلك يا قبر راح يملا الفضول جوفى
باسأل على ضلمتك هل تحتمل خوفى
وبعلو صوتى أسألك يا قبر ساكت ليه ؟
فكرتنى بوحدتى والشعر وحروفى
الشاعر يصور وحدة القبر وظلامه وخوفه وحدته فى رباعية واقعية مر بها السابقون ويمر بها اللاحقون والإنس والرحمة من الله خيال الشاعر الذى يلامس الواقع .
رباعية رقم 6 :
لازم يا صحبى تفوق وتغطى فى جروحك
دوس بالكلام ع الوجع واوصف دوا لروحك
إبكى فى حضن الصحاب هم اللى باقيين لك
واضحك فى وش الزمن ما تسمعوش صوتك
الرباعية تحث على الصبر والرضى : واوصف دوا لروحك
أى تأقلم وأبكى فى حضن الصحاب هم اللى باقيين لك أفكار الشاعر متوازنة مع حقيقة الحياة وتجاربها .
الرباعية رقم 7 التى جعلتها ختام حول أضواء الديوان محتاج إلى دراسة وافية ولكن لضيق الوقت والمتاح فى المجلة فهو تعريف بالشاعر :
ديما باشوف الحلم من بره
ولا عمرى دقت عصيره بالمره
ديما باشوف الحلم بالعافية
صايص وماسخ ومدلدق من الجره
فى الختام أحى الشاعر الهمام الذى امتعنى من خلال ديوانه البديع (نفس دافئ)
وأتمنى للشاعر التوفيق فى تجربته الفنية .
جـريــدة العروبــة
أسبوعية - سياسية - اجتماعية - ثقافية وأدبية
رئيس مجلس الإدارة ورئيس التحرير
الأستاذ / جمال عبد السميع
2 شارع عدى - ميدان المساحة - الدقى – القاهرة
الكاريكاتير
عندما ترسم الكاريكاتير فأنت تسبح ضد التيار تصارع من أجل إنقاذ فكرة لتصل إلى عمق الهدف تحاول أن تبنى رؤية خاصة تكون هدفاً للمتلقى تساعده على الفهم وإدراك المعنى . قد يصعب عليه الوصول إليه ، فهو فن اعتراضى قادر على أن يقلب المواضيع لصنع غد أفضل ، يقدر معاناة الفنان فى صناعة فكرة يقدر وصوله إلى المتلقى ، ويجلس فى خندق الاعتراضى ، ولكن لأنه فن لا يمسك البخور لحاكم وهو ليس من جملة المباخر لأنه فن ساخر وواع لا يهاب السلطان فى سبيل الحرية والأمان كما أنه لا يجلس على كرسي متحرك بالفرش الناعم وفى مكتب مكيف بل هو ضمن نسيج المجتمع يقف على عربة فول فى حارة يبحث عن لقمة عيش ، فهو يعانى ، ويترجم وينفعل ، هو فن ليس فنتازيا بل هو قادر على أن يقول الكثير ، وعلى استنباط شخصية محورية يلتقطها من المجتمع ويوظفها ويحركها مع أحداث الساعة ويتفاعل معها الناس وفن النقد الذاتى والحرية فى التعبير والبسمة من التناقض .
هذا الفن موهبة خاصة وحس مرهف وإبداع فنى متميز ، هذا الفن يجلس الفنان على الرصيف مع الباعة الجائلين ويلتقط الحوار وشكوى المرافق وهم يقولون عايزين نأكل عيس الحياة صعبة ، ولا مجال للوظائف والسكن حلم من الأحلام وبعيد المنال فى هذا الزمان وتفشى أمراض المجتمع تدفع الفنان رغم الألم أن يعبر ويسخر من الواقع حتى لا يصاب بالأمراض النفسية وضغط الدم المرتفع ، فن له جذور فى المخططات منذ عهد النساخين والوراقين قبل الطباعة بل قبل أن تعرض البرديات وجد فيها هذا الفن عن الفراعنة تحت بند السخرية .
زمن عجوز زاحف على همه
عـلـى جبــال ترميـه ولا تلمه
وأيامه تلج منشـفـه دمـــــــه
أحـــلامـــه بالألـــــــــوفـــات
وكـــلامـــه بــالآهـــــــــــــات
ودموعه نزله مغرقه كـمـــــه
قصيدة عشق
المركز الأول
شعر . بشرى الوردانى
وفى عز الليل والليل بردان
مليان حواديت
ضليله وشجرة ونخلة وبيت
وإيدين فنان
بتشد قميص الحلم يتوه
وبتنزع كل جذور الخوف
من جوه القلب يعيش فى أمان
نيمت عنيي فى حضن عنيك
وحضنت بشوقى ربيع لياليك
من جوه الصورة بترسمنى
وتمد إيديك وتطمنى
وتهدهد فوق جناحات الشوق
وبكل حنان أرتاح وأنام
حوالينا الدنيا الواسعة كبيرة
حوالينا الناس بتبص علينا
تقوم مفزوع
وتقفل كل بيبان الصورة
وتكتب فوقها
الشوق ممنوع !!
ترجع لى قوام
وتشد الحلم بسرعة تنام
وبريشتك تيجى تكلمنى
من جوه الحلم وترسمنى
ونتوه وأتوه مع نفسى وتنسانى
عطشان كما آدم عطشان
تفتكر الرسمة تكملها
ويتوه البرد مع الغلبان
وتحدد فى كمان وكمان
ولاهمك لونى المخطوف منى ؟
ولا رعشة صوتى المجنون بيك
ألا فيك مقابلنى بتحضنى
وتدفى عبيرى بألوانك
لو حتى دى آخر نقطه
شوق من جوه كيانى
هتسكنى
هتعصر وجعى بأوجاعك
وف آخر بيت
فى الصورة بأمد إيدى
أشد إيديك
واتخيل نفسى كأنى
مكانك
وبريشتك ألعب فى ألوانك
ورسمتك باب
عنوانه قصيدة عشق
ف قلب كتاب
وكأنك نفسى اللى لقيتها
من بعد عذاب
من بعد عذاب
عشر سجاير
المركز الثانى
الشاعر . محمد سلام
خامس سيجارة
ولسه مافردتش حروفك ع الورق ؟
يا منتهى سكك القلق ...
سه عندك صبر تقعد بالساعات
وكل ذرة فيك تئن وتتحرق ؟
سادس سيجارة ..
زى ما انت ..
احتمال فاق الاحتمال
وصوت صعود الدم جوه الجمجمة
بيدق أجراس الخطر ...
يا هلترى ...
مدن القصايد صحراوية ولا مزروعة شجر ؟
سابع سيجارة ...
آه يا قلم باكى ...
لو يخلص الحبر فى عروقك تبق اجدع ناى
تامن سيجارة ...
يا عيون حبيبتى الطيبة
يا سبيه ورده بلدى فى الخريف
سؤال من القلب اللى عمره ما كان شجيع
امتى ليه هترجعى أصلى خايف أموت
قبل ما يهل الربيع
تاسع سيجارة ..
الفجر بان
والهاموش بطل يحوم حوالين عمود الكهربا
الهاموش أصبح رماد ..
والصبح هيدوس فوق رمادهم
ناس بتشبه للهاموش
عاشر سيجارة ...
الصبح لاح ... والفطرة بتحب الصباح
معرفش ليه .. قلب الـ .....
لسه محسش بارتياح ؟
لا
المركز الثالث
شعر . عاصم المراكبى
صدقيهم
اللى قالوا على رجعى
ضد حرية طموحك
إسألى نفسك وروحك
إسألى الأيام هتنطق
إسألى الليل اللى يقلق
إنك إنتى حته منى
ساكنة إحساسى وكيانى
إسألى النخل ف غيطانى
شب عوده
قال عشانك مش عشانى
يبقى ليه أنا بره قصرك
مش معاصرك
واللى حاصرك لسه فى
اللى عمره فى يوم ما حبك
حبتيه
إدتيه منك منابي
حقى فيكى
واللى نابى ......
إنى ماشى فى خط سيرى
ومش لاقيكى
حد قال اللى يبنى فى ملك غيره
يبقى خط للمحال
واللى يمشى بعكس سيره
يبقى طالبك فى الحلال
وانتى فكرك بتبعينى
فين طموحك
اللى من أصلك عشانها تخرجينى
وابقى بره
إمته أشوفك بنت حرة
فارده شعرك تغسليه
فوق كتافك لاعبيه
زى هوه ما حس بيكى
حاسه بيه
إمته ييجي اليوم وأشوفك
فى السكك وسط الغيطان ؟
تملى م الترعة بكفوفك
ميه وتحمى العيدان
إمته ييجي اليوم وأشوفك
لابسه فستان الزفاف
بنت حضنت شوقها دفت
جوفى فى سنين العجاف
إمتى أروى عينى منك
وأحكى عنك
اللى غايب واللى شاف
ألف إمتى وميت تمنى
ياللى قلبى يوم ما حبك
قال عثرت فى حته منى
عطفة مأمون
المركز الرابع
شعر . جمال الجمال
أول ما تفتح شبابيكها
بتصحى الشمس الغفلانة
وتصبح على أهل حارتنا
يا صباح الخير يامه بهية
يا صباح النور ضى عنيه
أخبارك إيه ؟؟
بيقولوا الحاجة أم عطية
حيرانة هناك عند العاطفة
تستنى الشيخ مأمون يحضر
يرقى محمد ...
ماله المحروس ؟؟
المغصة فى باطنة مدوية
والواد عمال يهرى فى قلبى
وأبوه شغال فى الترحيلة
دا ماشفشى ضناه بعد ولادته
نعرفشى الدنيا خدته على فين
يشفى المولود ويجبله أبوه
بألف سلامة ....
يسلملى لسانك يا أصيلة
قولى إنشاء الله
يا صباح الخير عمى السيد
يا صباح النور
على مسك بنات عطفة مأمون
آه يا وعدى لو كنت صغير
جبت المأذون
بس يا راجل ....
الشيخ مأمون صلى معاكوا ؟؟
الشيخ مأمون ....
والله ما شفناه فى الفجرية . ليكون تعبان
راح نشرب شاى ونطل عليه
أصله امبارح كآت الرعشة تهز ايديه
والديسك بتاعه اسم الله عليه
من كتر البرد تعب رجليه
ادعيله يا بنتى الله يشفيه
البركة فى إيده بتشفى عليل
والعاطفة وحيدة بتبكى عليه
ربنا يشفيه ويبارك فيه
يا صباح الخير خلتى سنيه
يسعدنى صباحك يا ضناية
وأشيل الحنة على دماغى
وارقص لك وانتى بتتحنى
وحمام الحلة أطبخهولك
وفى ليلة الدخلة أجبهولك
تتهنى يا بنتى على عريسك
يسمع من بقك إنشاء الله
كآت أمى تملى بتحكيلى
على الطيبة الساكنة فى عطفتنا
وأبوى معاها يوصينى
بالعيش والملح
الله يرحمهم يا حبيبتى
تعشيلى يا غالية يا أميرة
بتحبى الخير لأهل الحته
ما هو إنتى مكان أنى وأبوى
يا صباح الخير .... يا صباح الخير ...
وفى أخر ناصية فى سكتنا
نلاقينا حمير ...
وحمير بتشد بعفيتها
عربية وفاضية ومغروزة
اتنين شنبات بيزوقوها
كرابيج ... كرابيج ...
وكلاب فى السكك السعرانة
بتحوم وبتنهش فى عقولنا
بالليل نسمعها ومنشوفهاش
بتقفل شبابيك الحارة ...
وتقوم الشمس الشقيانة
بتخش تنام
تصبح على خير .... تصبح على خير .....
قصة صبى
المركز الخامس
شعر . مصطفى عبد الرحمن
تاهت ملامحك جوه وشك من سنين
لما الجبين شابه البياض
والوش كرمش مالبلا
حن الولا
وسؤاله يخرج من ثنايا الكرمشة والهمهمة
ليه يا زمن - ليه يا بلد
ليه يا تاريخ ضهرى انحنى
فين الصبى - مات النبى
ماتت معاه كل السبل
انحت جبل
واعمل هبل
تمثال ووطى تحت رجله واعبده
قول نحمده
والهو يطرح بين ضلوعك ميت سبب
والعقل ينخر مالفراغ والوسوسه
راضى وهامتى فى الرمال متغطسة
زى النعام مليان دماغه بغطرسة
افتح بيبان الوهم وارسم فى الخلا
ضاع الولا
كان يوم بيحلم تبقى جنة مزوقه
كان صمته يصرخ بين جبال المشنقة
هتسبيى يرحل كام نبى
بنفش جناح البهدلة
مات الولا
ماتت معاه كل الطرق
اعرف جدودك واقرا فى كتاب الزمن
نفس المكان ....... تاه التاريخ
عاش الطن
المجذوب ... والدرويش
المركز السادس
شعر . شيماء عزت
حاسب !
أولاد الحاره بتحدف فيك الطوب
انت المجذوب
شايفينك ديب فى ضوافره الدم ..
لولد يعقوب
تجرى بخطاويك
تصرخ جواك " والله بريء "
لكن فى نهاية كل طريق حبس وقضبان
خمسين واحد ..
شايلين فى ذنوب ملهاش صاحب
جم يجروا عليك ..
لقوك بيهم ...
فتقوم تضرب تضرب فيهم ..
اونت المغلوب !
أما الدرويش .. يلبس فى سبح
تخنق فى رقبته ولا التعبان
ثعبان ! .. من إيه ؟
انت الدرويش ..!
تؤمر فى الناس ترقص بشويش
على لحن جراحهم
تسعد لنواحهم
وكأنه فرح يشرق فى إيديك !
تكويهم شمس شقاهم ليل ونهار
بتدوب فيهم حتى بذور الريش
يتعاركوا عشان فتفوتة عيش
وبتقنعهم : حبة حرمان على حبة هم
هتهيص وتعيش !
وبتدى عيال الحارة الطوب
علشان تفضل تحدف مجذوب
وفى نفس الوقت بتبنى سفينة
بتهرب بيها من المكتوب
بتبيع الخوف فى أزايز نور
بتمشى بخور
بينيم كل الناس وياك بتدور
وايديك شايلة الطبق المسحور
بيساعدك تعرف كل خبايا الناس
ده ماليه الخوف ده عنده جشع
من كتر اللف تدوخ وتقع
شايفاك قايم
مع إن الكون حواليك نايم
تضرب ع الطبلة ف وسط القوم
تؤمر فى الناس من تانى تقوم
بيت العروبة
المركز السابع
شعر . رضا عفيفى
على ايه نحارب بعضنا
دا كل خطوه فى عمرنا
لو كل واحد مننا
علشان نجمع شملنا
ونلاقى حضن يلمنا
فى الأقصى نسجد كلنا
على ايه نحارب بعضنا
وأطفال غزة المدبوحين
وذنبه ايه بس الجنين
دول قلبوا وجع السنين
وقلوب كتير غضبانين
هانفضل كده متفرقين
وأطفال غزة المدبوحين
نفسى تيجي مره نشره
تحيى بينا سنين العشرة
والكلل يعرف احنا مين
وقلوبنا مليانه باليقين
وأوضاعنا ليه مقلوبه
لازم تكون محسوبه
يبنى يإيده طوبه
فى بيت العروبة
من بردنا فى طوبه
ودمعتنا توبه
وأوضاعنا ليه مقلوبه
والله عليكم محتاجين
يموت ما بين المجروحين
فى بحر البقر ودير ياسين
من اللى بيحصل لفلسطين
متقطعين متبعترين
والله عليكم محتاجين
جايبه فرح ولا بشرى
مين الأصلى ومين القشرة
مهما اتكلموا الحاقدين
وفى حما رب العالمين
طبيبة خُلع
المركز الثامن
شعر . مصطفى عبد الحميد
متلخلخيش القلب لا حسن تخلعيه
دا أنا لسه بالأشواق وبالأحلام حاشيه
ومنفضه ولا فيه صفار ولا سوسة فيه
وان كان شقى فى الحب حاولى تقوميه
متلخلخيش القلب لا حسن تخلعيه
كل ما أقرب سنة تبعدى سنتين
والقلب نابه فى دنيتك دمع العينين
مع إنه معجون بالأمانى وبالحنين
لو شفتى لمعة ضحكته هتثبتيه
متلخلخيش القلب لا حسن تخلعيه
يا أحلى مينا فى الهوى دايب أنا
قلبك دهب ولا بلاتين ملينا هنا
دى جذور فؤادى اتخدرت من ميت سنة
وانتى بتخلعى الضرس برضه ما ترحميه
متلخلخيش القلب لا حسن تخلعيه
يا أم العيون لبنيية وشعور الدهب
حشيتيه مؤقت بالغرام مات العصب
ورجع له تانى السوس ملاه ولا عود قصب
لو كنتى بالإخلاص حاولتى تعقميه
داماكنش يحتاج تبرديه وتخلخليه
منك بقى لله ما دمتى هتخلعيه
جـريــدة العروبــة
أسبوعية - سياسية - اجتماعية - ثقافية وأدبية
رئيس مجلس الإدارة ورئيس التحرير
الأستاذ / جمال عبد السميع
2 شارع عدى - ميدان المساحة - الدقى – القاهرة
يا ربى قربنى
المركز التاسع
شعر . سارة أشرف
ما يهمنيش الظلم
لو كانت مش غضبان
يغمرنى بحر رضال
ويغرق الأحزان
أنظرلى نظرة رضا
وادينى كهف أمان
أنسج عليه بخيوط
وأمسك حمام ولهان
يا حبيبى يا ربى
لازم يبان حبى
ويسمع الأكوان
من صغرى تهدينى
إسلام يكون دينى
م الشر تحمينى
وأنا لسه مش داريان
لو مره بان ضعفى
بارفع إليك كفى
واسمع نداك لىّ
تعالى قرب لى
وازاى بتسمح لى
بالقرب يا رحمن
بدموعى بتوضى
والدمع من فضه
وأنا كنت ببكى زمان
بدموع شبه دمى
بحنان غلب أمى
تناديني وبإسمى
قم دوب الجدران
من بعد بانده له
من قرب بنده لى
وبروح على مهلى
وبيجرى يوصل لى
ما أروع الأحضان
الحضن دفانى
من برده عصيانى
بالرحمة قوانى
عالنفس والشيطان
أنا من تراب وضعيف
والقوة من عندك
باكل حنان برغيف
وأشبع وأقول عطشان
اسقينى من حبك
دوقنى من قربك
أنا لسه مش شبعان
شبعنى ... شبعنى
بالحب شبعنى
نسينى مين خانى
نسينى جرح زمان
كفك دوا ليّ
ع الجرح حنيه
إزرع هواك فيا
تلقى النخيل كبران
شيطان بيخدعنى
ماشى وبيسحبنى
ع الأرض وقعنى
وأنا فى السما دارى
والنجم لو عارى
باكسيه بضي بيان
بيقولى مش جنبك
ده بعيد ومش سامعك
وبينسى إن انت
يا رب جوايا
شايفك وبتشوفنى
وف قلبى المرايا
يا الله لرضاك خدنى
خليك هنا معايا
حلم عيل
المركز العاشر
شعر . عبد المنعم شرف الدين
فرن طين
وأنا فوقه نايم
نحلم أحلام ميتين
متلونة بلون الطين و الغمايم
زى ما أكون مت
وتهت فى سكة قبرى
وعيل راكب توك توك
بيعلن للناس خبرى
واحد يتشاهد
وواحد يفرك عينيه
ويقول ابن كلب
مات فقرى وعاش فقرى
أصل الحكاية م الأول
حلم عيل
حلم فى يوم
يكون إنسان
مجرد إنسان
ما هو عيل
زى بقية العيال
وحلمه بسيط قوى
إنه يفضل إنسان
لكن الحلم اتنسى
وتاه فى زحمة النسيان
وتاهت معاه أجمل أيام زمان
يوم ما كان بيجرى ورا عربية الجاز
ومالى جيوبه كسر إزاز
وحبة غيطان كازوزه
مرصصهم جنب بعض على هيئة برواز
وماسك فى غيده إبره
بيلضم بيها النور فى خرم العتمة
لجل ما ينور لحلمه طريق
وبتنفس مع الصبح
حلمه الصابح البرئ
لجل ما يقدر يعيش
وسط غابة سكناها وحوش
معدمة الإحساس
ولما الليل يليل عليه
كان بيجرى يستخبى
أصله بيخاف قوى من الضلمة
والإبتسامة الوحيدة
اللى إترسمت على شفايفه
لحظة ما كان مرمى فى مقلب زبالة
وكلاب السكك بتنهش فى حلمه
بس اللى حذ قوى جوه نفسه
إنهم ما لموش الباقى من حلمه
فى أكياس
مصر الحبيبة
شعر . مريم توفيق
طبع فينا من زمان
ياه
كل ده كنا يئسنا منكو
قلنا جيل خانع وضايع
ياما قلنا وعدنا عنكو
ياما قلنا بعتو مصر بكيس فشار مع صحن فول
ياما قلنا سبتو مصر ياكلها غول
والبطالة والندالة والتحرش والرزالة
والقعاد ع النت والفيس بوك وتشيت
وتلغى فى العقول
فجأة ياولاد الفراعنة قام تحتمس
شد عبد الله وبطرس للميدان
والهتاف هادر بيعى من حناجر
ست جميانة وجيهان
والعيون فيها العزيمة
والقلوب شايلة الكرامة
والتحضر والإيمان
يحرس القبطى صلاة المسلمين
ويؤدى قداسة ف أمان
تكتبوا تاريخ بلدكم من جديد
عادة المصرى بطول الدهر وف كل العهود
لما يطغى الظلم ويعشش غراب الشؤم
فوق كل الحيطان
كل ده جواكو كان
كام شهيدة وكام شهيد
دمهم سجل لمصر تاريخ مجيد
اغتيال الورد فتح ألف طاقة
للتحدى والتصدى والجراءة
سجل الورد اللى غارق فى دماه
ألف زغروته وقصيدة للحياة
جرحرت بالعار ديول كل الطغاة
وانتهى عهد التجسس واللصوص
واللى زور واللى فجر واللى عذب واللى سيطر
واللى قاعد فوق قلوبنا كأنه عنتر
كل ده يحصل على الفيس بوك بلمسة
كل ده جواكو لسه
اوعوا تفتكروا أن ثورتكو
انتظم ليها المدار
الأفاعى لسه ليها ديول وأتباعها كتار
قطع كام هامة لتنين الفساد والإنكسار
مش كفاية لازم الأذناب كمان تلقى الدمار
أصل ثورتنا شعارها
المساواة والعدالة والأمان
مش هيفضل فيها للطغيان وللإذلال مكان
كل ده ه تاريخنا وطبع فينا من زمان
تاج النسب
شعر . محمد عباس
عجب كنا نتيه عجب
نحن الفراعين العرب
تاج يتيه به النسب
لا تستوى معنا الشهب
فاحذر سماكين الغضب
أحفاد جالوت وسينا
وصلاح حطين ومينا
نحن البراكين التى لن تستكين
نحن الأولى قبروا الغزاة وألبسوا الأسد العرين
نحن الأولى محقوا عمالقة الفيالق والشواهق والصواعق
وارتدوا النصر المبين
أبداً تظل لنا مغاوير الجبابر خاضعين
مكر الغزاة لكى نطأطئ شر مكر
والله رب العرس خير الماكرين
سنظل رغم الجرح فوق الخلف نسمو
نحن الأولى لا يستطيع سوى الزمان
بأن يكون لنا قرينا
نحن الأولى لا يستطيع سوى العلا أن يشترينا
ديوان جديد للشاعر مصطفى فريد
على الربابة
بأعزف مشاعرى
يمكن بشعرى
ألقى استجابة
من كل مصرى
وحامى عصرى
ساهم فى نصرى
من الديابة
وبعزم إيده
صنع له عيده
يا رب زيده
قوة وصلابة
كلاسيك
شعر . أمل عامر
إحساسك إيه
وإنت بتختصر الدنيا
فى جهاز إرسال
أصغر من كف إيديك
يصبح مصدر لسعادتك
وتملى سبب لشقاك
والأغرب
إنك بتحافظ على تفاصيله
أكتر من روحك
واما يغنى لك
بتطير م الفرحة
وان رد الصوت الألى
من غيظك
ترميه على أول شيء بيقابلك
لكن لما يشع كلام ورسايل
تحضنه بإيديك وتبوسه وتضحك
وتقرر تشحنه بحنانك
وتجيب له هديه
أول حرف ف اسم حبيبتك
وتعلقه فى ودانه بفرحة
ولإنك طيب .. بتسامحه
لما رصيده من الأشواق بيقل
الناس بيقولوا عليك مجنون
ازاى وبكل براءة
بتعدى أيامك
وكيانك مرهون بغناه
إفرض قرر فجأة يسيبك
راح تعمل إيه
لو قال : بكفاية لنفسه
تعبت من الشغلانة .. ما تريح قلبك
وتفضك من وجع الروح
يا تطير على أبعد نجمة
وتخبي حبيبتك جواك .. وتعيش
رسالة إلى طاغية
شعر . عاطف الجندى
ثلاثون عاماً
وما من جديد
سوى أن رجعنا
لعصر الجليد
فقدنا الذى كان بين الأحبة
دفء اللقاء بخضن الوريد
فقدنا البكارة فى كل شيء
وصرنا عبيداً
وما من عبيد
وصرنا رماداً لمجد تولى
وصرنا غباراً
لماض تليد
وصرنا سبايا لإرث التملك
فتوى الطوارئ
حكم الجديد
لنا كل يوم بكاء جديد
وحزن مقيم
وقهر فريد
وأنت بأعوامك الكثير
باق علينا
تبيد الضياء .. وتغنى النشيد
ولو كنت ربا
فإنا كفرنا
بآيات حسنك .. ها قد مللنا
وضاق الفضاء
وما من مريد
وما كانت يوماً رسولاً لشيء
سوى دعوة .. للضنا .. والوعيد
ثلاثون قهراً
وما قد شبعت
وتبغى المزيد .. المزيد .. المزيد
رصيدك فى الحب صفر
وفى الفقر شعب
وأيامك السود
لا تنتهى أو تحيد
شقيقك فى البطش
فى (جدة) الآن يبكى عليك
ويدعوك أن تقتقى دربه
كالبريد !
أرفض السكوت أرفض القنوط
اياك تكون لعبة بخيوط
اياك تيطاطى لأجل الريح تفوت
قول كلمتك
الكلمة أصل الملك والملكوت
لماذا يا ابى
قصة قصيرة . أمل يوسف
ماذا تقولين ؟ وما عادت أشياء تسمى بهذا المسمي اليوم ؟
تجمدت الكلمات فى فمي وهو يرددها أمامي تداخلت بادخلى تساؤلات عربدت فى فوه حاولت أن أكتم غيظي لم أستطع
لماذا تصرخ فى وجهي ؟ ما الذى دفعك على هذا ؟
وملامح وجهه تتغير . تكاد أن تتبعثر لإنك تتحدثين عن وهم ندر اليوم تناثر فع الريح أبل اندثر وسط الزحام .
كتمت ما بداخلى . حاولت أن اسمعه ، نسيت الإجتماع الذى جئت من أجله ، بروده الشتاء مشتدة . وظللت صامته اسمعهم يتحاورون .. أصواتهم شبه عاليه ممزوجة بالإنفعال أحياناً وبالسخرية مرة أخرى ، التفت إليهم . ماذا يحدث من حولى . كأننى فى معركة وسباق " تتحدثين عن العلم والشباب ، تقارنين بين الأمس واليوم ، كنا مكبين حباً للعلم عاشقين له . تسلل الحب فى عروقنا ، بل كم كان يزداد يوم بعد يوم ، وصار اليوم غريباً ، وكنا دائماً فى سباق العلم والعلماء ، كنا تتفى خطاهم كى نحمل شهادة نسمو بها لا تسمو بنا .. صارت اليوم أقاويل لا قيمة لها ، بل رموزاً يسخر منها الناس حتى الأطفال الصغار .
ولكنه العلم يا سيدى والبحث عن ؟!
العلم صار اليوم فى سباق مع الريح ، يكاد أن ينتصر عليه . راح يصرح فى وجها ، قائلاً بالأمس قال لى ولدى ، ماذا أفاد العلم وأنت الأستاذ الذى يمكث أمامك الآلاف من الطلبة .
ماذا جنيت من وراء نجاحك وكتبك وعلمك المتدفق ؟
حاولت أن اهدأ من فزعة أخفى ما به
ولكنك الأستاذ العالم الذى نرتشف من علمك أحياناً أسأل نفسي ، حياتي وهبتها للعمل قدمتها للمجتمع ماذا قدم لى المجتمع ؟
كنت أصغى إليه يقنعنى بكلامه ، ويضايقنى تارة أخرى ، وأحياناً ينهزم الصمت فيتغلب عليه الكلام .
ولكن أبى علمني منذ الصغر أن أعشق العلم وكلما يزداد العلم يزداد قيمة الإنسان .
ذاك سنوات قديمة
هى ليست بالقديم
يا سيدتى ماذا تقولين ، لقد قارن ابنى بينى وبين أحد الجهلاء وجدته يفخر بجهله لأنه صار اليوم ..
أدركت عن من يتحدث العالم ، لم أعلق حاولت أن اقتنع بالحديث ، لكن مازالت كلمات أبى ترن فى أذني ، حقاً إنه اليوم صار مع الريح وددت أن أصرخ ، لماذا يا أبى أوهمتني بإن الإنسان قيمته تمكن فى العلم ؟
لمح فى وجهي وعيني الحيرة ، ظل ساخراً وهو يعرض على مواقف من الشباب الذين ينتظرهم المجتمع .. يتلهف عليهم الوطن ، السلاسل المعلقة بين صدورهم وأيديهم ، وكذلك الشعر الذى يئن من طوله ورائحته تلوثت بكل الروائح الصناعية والألوان الباهتة ، ضاعت القيم حتى الوجوه تغيرت .
مازال يحدثنى وكأننى جئت من عالم مغاير يسألى أين الرجال فى ملامحهم بنعم الوطن لهم أشعر بالقهر يزحف بداخلى ، لكن ماجدواه أجيال بل فى الحقيقة خوفي على وطني ما أصعب الذكريات ، كان أبى فى المساء يجلس أمامنا يحوم الصمت من حولنا والهدوء يرتعش منا احتراماً وإجلالاً ، وكان جبينه يشع نوراً كأنه أراد أن ينير طريقاً هى الآن تائهة ، لا تدري أين هى ؟ وكان يردد دائماً ، اتدرون كيف تكونوا أقوياء وأثرياء فى آن واحد ؟
لاشيء عيز العلم والبحث عنه ، وكان يشير لى وكلامه مصوب لى ، كوني قوية بالعلم ، تسلحي به أحبيه كي يحبك ، ابحثي عنه بالطبع ستجدين لا تشك من العناء ولا الأسوار ولا حتى الوقت .. ستنيلين تاج العلم الذهبي عثرات الطريق يا بنيتي كثيرة ، ولكن تذلل من أجل حبك للعلم ، يحذروني كثيراً من ضياعه وكأنه يعلم إنني لا أملك حتى سمي ، لا أحمل بداخلى بقايا عيز اسمك يا أبى ، كم أنا مهمومة ابحث عن اسمي الذى ضاع مع أناسي لا يعرفون قيمة العلم والقلب . أترى من أنا يا أبى ؟
الشماتة فى عيونهم ، أحدق فى وجهه أصرح مثله ، ولكن كيف أغير ما علمه لى أبى ؟ وكيف أمزق دمائي ؟ وكيف يا سيدتى ، لن يستطيع البحث مرة أخرى عنى ؟ من أين لى بطفولة عيز طقولتي كى أعيز كلامك يا ابى .
مازلت حائرة . هل أصدق ما استمتع إليه الآن خل ارحل عن عالم لا أعرف كيف أسبح فيه ؟
أحدق فى اللافتات على الجدار فى الشوارع لماذا يحيط بى الصمت من كل جانب ؟
اعتصر والدقائق بطيئة متوانية ، لم أستطع أن أكتم صرختى هذه المرة وأنا قعيدة بسلاسل عميقة ، ولكن من يعلم ما تحمله صرختى .
الكل ينظرون . صوت الناى بداخلى يهز أوصالى أكرر صرختى التى تنفجر من الداخل لماذا يا ابى ؟ ... لماذا يا ابى ؟
مسابقة صلاح هلال الأدبية للقصة القصيرة فى مصر والعالم العربى الدورة العاشرة لعام 2011
صرح أبو العنين شرف الدين
(1) المسابقة مفتوحة لجميع الأعمال
تلقى الأعمال 1/1/2011 حتى 15/5/2011
(2) يقدم العمل من ثلاث نسخ بالكمبيوتر .
(3) يقدم عمل واحد فقط على أن يكون العمل لم ينشر من قبل
(4) جوائز المسابقة 1500 جنيهاً .
(5) الفائز الأول يمنح درع المسابقة وجائزة مالية وشهادة تقدير
(6) الجوائز من الثانى حتى الخامس جائزة مالية وشهادة تقدير
وميدالية المسابقة
(7) من السادس حتى العاشر شهادة تقدير وميدالية المسابقة
(8) تنشر الأعمال الفائزة فى مجلة مبدعون
(9) جائزة خاصة بناء على تقدير اللجنة ودرع المسابقة وجائزة مالية
(10) الفائزون فى الأعوام السابقة ليس لهم الحق فى الاشتراك إلا بعد عامين من تاريخ عوزهم من الأول حتى الخامس
ترسل الأعمال على العنوان الآتى
6 شارع الملك فيصل ميت غمر - دقهلية
0127393794 - 0198847762 - 6950738/050
Email : salahhelal66@yahoo.com
أخبار ثقافية
يقام مساء يوم الخميس الموافق 28/4/2011 الساعة الرابعة حتى الثامنة والنصف مساءاً ، ندوة ثقافية حول ثورة 25 يناير 2011 يشارك فيها الرائد الثقافى .
إبراهيم الرفاعى
رئيس إقليم شرق الدلتا الثقافى
ومدير عام ثقافة الدقهلية
ومدير الشئون الثقافية
وأدباء الدقهلية والشرقية وكفر الشيخ ودمياط
يرئس الندوة أ.د/ يسرى العزب
أمانة المؤتمر الثقافى / أبو العنين شرف الدين - إسماعيل علام - عبد العال عبد الرحيم - مجدى محمود نـجم - جمال الجمال - حسام المقدم .
ولجنة التنظيم د/ عاطف خاطر مدير القصر
المحاسب / عزت الدسوقى مشرف نادى الأدب
والدعوة عامة للجميع
الصمت منون
شعر . أبو العنين شرف الدين
أطلقى الأشجار من صمت المنون
فنحن إما أن نكون أو نهون
أطلقى رجال الحق
من غيابات السجون
واكشفى ستائر المجون
ضمير العالم المحكوم
بالطاغوت مات
يلبس الباطل ثوب التبريئات
شجباً بالكلمات
ووعود التعلب فات
والشر ها هنا بات
يحصد البراءة والطفولة والرجولة
والأمل الآت
أى نجم يا ترى يصعد
فى أفق الكآبة
مجدنا العابر هل يوحد بابه
ويوضح أسبابه
سألت الحق أن يحتويه
يزاوج ثغرة الأحرف الشاردة
فنحن إما أن نكون أو نهون
وسط الميدان نتحدى الشيطان
والفرعون والكهان
وصحرة هامان
ودعاة أزهى عصور الديمقراطية والأمان
وفساد وفجور وإدمان
ودهاء يهزم الشيطان
وقارون وحملة الأبخرة والدخان
والمحروسة بعناية الرحمن
تتحمل فى عرس الأمن والأمان
مش كـــل واحـــــد بيكتب يتحسب فنان
والفـــــن له سلطنه فى القافية الأوزان
ولابد يبقى سليم فى الكلمة والمـعنــــى
وروح تصحى اللى يقرا وتفتح الأذهان
طول عمرى لجل الجمال من دوح لدوح
بين النجوم والبلاد سواح منين ما أروح
وسفت أنواح كثيرة من الجمال يــامـــــا
ما لقيت فى الدنيا أجمل من جمال الروح
0 التعليقات:
إرسال تعليق